INFOMAX.MK

За време на вчерашниот конфликт меѓу припадниците на КФОР и локалните Срби во Звечан, уапсени се Радош Петровиќ од Митровица и Душан Обреновиќ од Звечан.

Адвокатот на приведениот Петровиќ, Дејан А. Васиќ потврди дека неговиот клиент е во Полициската станица во Јужна Митровица и дека бил сослушан синоќа.

Како што рече адвокатот, уапсениот раскажал дека припадници на КФОР го влечеле додека седел на асфалтот заедно со други демонстранти.

„Во тој метеж го згази војничка чизма, а кога беа фрлени солзавец и шок бомби, косовската полиција го извлече и практично го заштити од некои тешки последици“, рече Васиќ.

На Петровиќ му е одреден 48 часовен притвор, но за какво кривично дело се товари се уште не се знае.

Васиќ рече дека синоќа го видел и уапсениот Обреновиќ, но дека не успеал да разговара со него.

Покрај Петровиќ и Обреновиќ, по вчерашниот судир со КФОР беа уапсени уште двајца Срби.

Адвокатот Предраг Миљковиќ, кој го застапува Душан Обреновиќ, кој беше уапсен вчера во Звечан, за Косово онлајн изјави дека неговиот клиент бил брутално претепан од припадници на косовската полиција.

„Душан Обреновиќ вчера бил тешко претепан од косовската полиција при неговото апсење, а како што вели тој, кога бил донесен во полициска станица. Се здоби со разни повреди на главата, расекотини, рани, хематоми на главата. Беше страшно и брутално претепан. Ми кажа синоќа дека бил претепан и овде во општинската зграда кога бил уапсен“, изјави Миљковиќ. .

Тој додаде дека Обреновиќ се товари за кривично дело „предизвикување отпор и загрозување на лице под меѓународна заштита“.

Како што додаде, на Обреновиќ полицијата му одредила притвор од 48 часа, а од обвинителот зависи дали ќе биде изведен пред судот.