Што се касетни бомби кои САД планираат да ѝ ги дадат на Украина и зошто толку остри реакции од целиот свет?!

САД одлучија да достават касетна муниција во Украина, потврди Белата куќа во четвртокот. Вашингтон ќе го снабдува Киев со ова контроверзно оружје и покрај повиците од групите за човекови права Украина и Русија да престанат да користат касетно оружје.

Касетната муниција е забранета во 120 земји во светот, но не и во САД и Русија.

Што е касетна бомба?

Касетните бомби се фрлаат од авиони или се истрелуваат како ракети од хаубици, топови и ракетни фрлачи. Тие содржат стотици мали експлозивни направи кои се расфрлаат на многу голема површина – од големината на неколку фудбалски игралишта до неколку хектари земја. Тие експлозивни направи убиваат не само војници, туку пред се цивили, а меѓу нив често и многу деца. Касетните бомби се користеле уште од Втората светска војна, а биле користени, на пример, во Виетнамската војна. Соединетите Држави фрлија околу 260 милиони мали експлозивни направи над Лаос, со што таа земја стана најзагадена со експлозивни направи во светот.

Децении подоцна, неексплодираните бомби можат да станат смртоносна замка, бидејќи само околу 40 отсто експлодираат кога ќе паднат, според хуманитарната организација Handicap International. Тие експлозивни направи можат да повредат или убијат лице кое ќе наиде на нив во секое време. Тие имаат слично катастрофално дејство како противпешадиските мини и ги прават областите каде што се расфрлани опасни по животот на луѓето, пишуваше тогаш ДВ.

Каде се користеа касетните бомби?

Повеќе од 120 земји ја потпишаа Конвенцијата за касетна муниција, која забранува употреба, производство, пренос и складирање на оружје. Русија, Украина и САД одбија да го потпишат договорот. Од усвојувањето на конвенцијата во 2008 година, според Коалицијата за касетна муниција, 99% од глобалните резерви се уништени.

Оружјето првпат било употребено во Втората светска војна, а најмалку 15 земји го користеле во годините оттогаш, според Ројтерс. Меѓу нив се Еритреја, Етиопија, Франција, Израел, Мароко, Холандија, Велика Британија, Русија и САД.

Руските војници користеле касетна муниција во населените области во Украина, открила истрагата на Гардијан, што резултирало со смрт на десетици цивили. Украина ги користела и во обидите да ги врати териториите под руска окупација, според Хјуман рајтс воч.

Зошто Украина сака касетни бомби?

Киев се залага за касетни бомби, тврдејќи дека оружјето ќе помогне во контраофанзивата и ќе и помогне на нејзината армија да ги таргетира зацврстените руски позиции и да го надмине недостигот од војници и артилерија.

До неодамна, Вашингтон се спротивставуваше на повиците на Киев, наведувајќи ја загриженоста за употребата на оружје и велејќи дека тие се непотребни. Меѓутоа, американските власти неодамна навестија за промена, при што висок функционер на Пентагон минатиот месец изјави дека американската војска верува дека касетната муниција „би била корисна, особено против зацврстените руски позиции“, пишува „Гардијан“.

Но, групите за човекови права ги повикаа Русија и Украина да престанат да користат касетни бомби и ги повикаа САД да не го снабдуваат Киев со „инхерентно неселективна“ муниција.

„Касетната муниција што ја користат Русија и Украина сега убива цивили и ќе продолжи да го прави тоа уште многу години“, рече Мери Вареам, вршител на должноста директор за оружје во Хјуман рајтс воч.

„Двете страни треба веднаш да престанат со нивната употреба и да не бараат повеќе да се здобијат со ова неселективно оружје.