INFOMAX.MK

Logo
HomeСвет
СВЕТ
Сијарто: Неверојатно е дека Унгарија се очекува да плати милиони евра од своите даночни обврзници за вооружување на Украина
02/09/2023

Ова го изјави денеска унгарскиот министер за надворешни работи.

Воената дебата повторно покажа дека треба повеќе да зборуваме за мир „бидејќи огромното мнозинство сè уште зборува за војна“, рече Петер Сијарто по неформалните состаноци на европските министри за надворешни работи во Толедо, Шпанија.

Мнозинството е за продолжување на вооружувањето, додаде Сијарто, соопшти неговото министерство.

Тој пристап и предлогот на ЕУ за доделување пет милијарди евра годишно за воена помош во следните четири години покажаа дека „сите сметаат на долготрајна војна“, продолжи министерот.

„За жал, денеска повторно бев единствениот кој зборуваше против тој пристап. Не сакаме уште четири години војна, сакаме да ја завршиме што е можно поскоро“, рече Сијарто.

Според него, Унгарија била под огромен притисок да гласа за нова транша од 500 милиони евра за испорака на оружје за Украина и пакет од 20 милијарди долари во следните четири години.

Тоа значи дека унгарските даночни обврзници ќе треба да платат 210 милиони евра иако „воопшто не се одговорни за војната“, нагласи тој.

Унгарија одбива да разговара за овие предлози додека Украина не ја отстрани ОТП банката од листата на меѓународни спонзори на војната.

„Неверојатно е дека Унгарија се очекува да плати милиони евра од своите даночни обврзници за вооружување на Украина, а истата таа земја ја нарекува банката со сметките на три милиони Унгарци меѓународен спонзор на војната“, посочи тој.

Жозеп Борел, високиот претставник на ЕУ за надворешна и безбедносна политика, понуди да се сретне со Сијарто и со украинскиот министер за надворешни работи Дмитро Кулеб, но подоцна се повлече, рече Сијарто и тврди дека му рекол на Борел дека ОТП банката не ги прекршила европските закони или санкции.

Што се однесува до унгарското малцинство во Украина, Сијарто рече дека на 1 септември ќе започне „украинизацијата“ на околу 15.000 ученици, а Унгарија истовремено ќе обезбеди образование за 5.000 украински деца бегалци.

Тој додаде дека новите правила кои стапуваат на сила во Украина претставуваат „сериозно кршење на меѓународното право“ и најави дека Унгарија ќе го смета ова прашање за приоритет кога наесен ќе почне проценката на апликацијата на Киев за членство во ЕУ.

Унгарија, исто така, остро ќе се спротивстави на предлозите за воведување санкции врз рускиот енергетски сектор, рече Сијарто.

„Не само затоа што тоа е против нашите национални интереси, туку и затоа што санкциите против нуклеарниот сектор се одличен пример за тоа како санкциите ја уништуваат конкурентноста на европската економија и како нè прават будали“, посочи тој.

САД повеќе од двојно го зголемија увозот на ураниум од Русија во првата половина на 2023 година, рече Сијарто.

Зборувајќи за ситуацијата во Западна Африка, министерот изјави дека доколку тој регион не успее да воспостави мир и стабилност, ќе стане извор на нови миграции со кои Европа нема да може да се справи.

„Наместо да помогне во одбраната на надворешните граници… Брисел продолжува да ја поттикнува миграцијата“, посочи Сијарто.