INFOMAX.MK

По драматичниот меч во пет сета против Ласло Ѓере во минатото коло, Новак Ѓоковиќ имаше помирна ноќ во осминафиналето од Ју-Ес опен, совладувајќи го Борна Гојо од Хрватска со 6-2, 7-5, 6-4. Во четвртфиналето ќе игра против Тејлор Фриц, кој е еден од тројцата Американци во друштвото најдобри осум. Такво нешто не им се случило на домаќините на Ју-Ес опен уште од 2005 година.

Два и пол часа траеше мечот на „Артур Еш“ во раните утрински часови по централно-европско време, а 25-годишниот квалификант од Сплит најголем отпор пружи во вториот сет.

„Го гледав Борна и видов дека има силни удари, дека форхендот и сервисот му се оружја. Добро се движи за својата конституција. Клучот беше да му го намалам бројот на асови и сервис-винери, тоа да го исконтролирам. Јас се фокусирав на прецизноста во мојот сервис, помалку на силата. Среќен сум што поминав во три сета“, истакна Ѓоковиќ по мечот.

Следен ривал ќе му биде Тејлор Фриц, деветтиот носител, кој исто така мина три сета и нешто над два часа против Доминик Стрикер од Швајцарија, триумфирајќи со 7-6, 6, 4, 6-4. Во четвртфиналето ќе се обиде да мрдне од нула во скорот на дуелите со Ѓоковиќ, кој во моментов изнесува 0-7.

Четвртфиналисти станаа и десеттиот рекет, Френсис Тијафо, како и Бен Шелтон, па ќе вкрстат меѓу себе во следниот круг. Шелтон направи мало изненадување, елиминирајќи го 14-то рангираниот Томи Пол, исто така од САД, со 6-4, 6-3, 4-6, 6-4.

Извор: sport1.mk