Шолц: Европските земји и членките на НАТО нема да испраќаат војници во Украина

Германскиот канцелар Олаф Шолц денеска изјави дека европските земји и членките на НАТО нема да испраќаат војници во Украина.

„Се разговараше за тоа дека тоа што е договорено меѓу сојузниците од почетокот, да важи и за иднината, а тоа е дека на територијата на Украина нема да има војници на европските земји или членки на НАТО“, изјави Шолц по самитот на европските лидери што се одржа во Париз.

Тој посочи дека европските земји се подготвени да набават оружје од трети земји, надвор од Европа, со цел да се забрза испораката на воена помош за Украина.

Испраќањето копнени трупи во Украина го отфрли и германскиот министер за одбрана Борис Писториус.

„Тоа не е опција за Сојузна Република Германија“, рече Писториус на прес-конференција.

Портпаролот на британскиот премиер Риши Сунак денеска изјави дека Велика Британија не планира да распореди борбени трупи во Украина.

Францускиот претседател Емануел Макрон изјави во понеделникот, по самитот на европските лидери во Париз, дека иако нема консензус за испраќање војници од европските земји во Украина, „ништо не може да се исклучи“.

Share on Facebook

Tweet

Follow us

Save