INFOMAX.MK

Управата на Шкупи подолг период води своевидна војна со сопствените навивачи или со барем дел од нив, а во прилог на ова е и денешното клупско соопштение во кое има и закани за санкции за сите што ќе ги прекршат законските норми предвидени за еден спортски настан.

Чаирчани им се заканија на фановите што ќе палат експлозивни материи во стадионот дека ќе бидат избркани од него, но и дополнително гонети.

„Ве замолуваме да не се носат забранети и експлозивни материи и тие да не се палат во стадионот. Во наредниот период со сите сили ќе се бориме против оние кои сакаат клубот да биде казнет, оние кои не се од нас, а се однесуваат како да се наши, оние кои се алатка за потребите на другите и оние кои сакаат клубот да биде оштетен. Тоа ќе го сториме со заострување на безбедносните мерки во рамките на законот, со поддршка на полицијата, па тие да се избркаат од стадионот, никогаш повеќе да не влезат и да бидат казнети. Дополнително, по натпреварот, оние кои го прават ова ќе бидат идентификувани преку безбедносните камери и против нив ќе бидат преземени дејствија пред надлежните органи“, се вели во дел од соопштението на Шкупи.

Екипата од Чаир следниот домашен меч ќе го одигра в недела, кога ќе го пречека тимот на Тиквеш (14 часот).

Извор: sport1.mk