Украинската армија ја зазеде единствената станица во Русија за транспорт на гасот кон Европа

Украинската армија, која влезе во регионот Курск, во средата попладне успеа да ја освои мерната станица за гас во градот Суџа, преку која рускиот гас се испумпува во Европа, јавуваат руските воени дописници.

Суџа, единствената преостаната точка за пумпање гас на „Гаспром“ преку украинска територија, е под контрола на украинските вооружени сили од 13 часот по московско време, објави каналот на Телеграм со име „Рибар“.

Според другите воени дописници, самиот град Суџа бил оперативно опколен: таму се лоцирани трупите на Министерството за одбрана и силите на ФСБ. Фотографиите од дронови од контролниот пункт Суџа покажуваат траги од гранатирање и уништен тенк. Станицата на „Гаспром“ се наоѓа во непосредна близина на контролниот пункт, пишува „Рибар“. Според неговите податоци, од почетокот на денот, украинските војници успеале да напредуваат уште 3 километри во областа Курск, а под нивна контрола се селата Обуховка, Покровскоје, Толсти Луг и Љубимовка.

„Гаспром“ дневно испумпува приближно 40 милиони кубни метри гас за извоз преку станицата Суџа. Ова гориво се доставува во Австрија, Словачка и Унгарија и обезбедува приближно половина од испораките на „Гаспром“ во Европа. Преостанатиот гас европските земји го купуваат преку Турција преку гасоводот „Турски тек“.

Според очевидци, украинските вооружени сили го окупирале западното предградие на Суџа. Украинските трупи веќе оперираат во самиот град откако преку ноќ можеа да соберат резерви, а постои многу сериозна можност да се загуби Суџа, пишува „Воен информатор“.

Следна цел на напредните украински вооружени сили би можела да биде нуклеарната централа Курск, смета воениот дописник на телевизијата Русија-1, Александар Сладков. Украинските војници се оддалечени околу 45 километри од станицата, која снабдува со енергија 19 региони на Централниот федерален округ.

Неочекуваниот марш на украинските вооружени сили до границата во областа Курск го изненади руското воено раководство: до средата наутро контролата беше изгубена над 11 населени места во регионот. Претседателот Владимир Путин одржа итен состанок со членовите на владата и шефовите на безбедносните агенции, по што го обвини Киев за „провокација“ и напади врз станбени згради.

Share on Facebook

Tweet

Follow us

Save