(Видео+видео галерија) Обвинетите за убиството на Вања и Панче на обвинителна клупа – Палевски не дојде во судот

Основниот Кривичен суд во Скопје денеска го одложи судењето за обвинетите за убиството на Вања Ѓорчевска и Панче Жежовски.

Во Кривичниот суд се донесени обвинетите Боре Видевски, Велибор Манев и Влатко Кешишов, како и таткото на девојчето, Александар Ѓорчевски.

Првообвинетиот Палевски не беше донесен во Кривичниот суд поради одлагањето на судењето. Одлагање побарала одбраната на Палевски со образложение дека е потребно повеќе време за да се подготви.

Основното јавно обвинителство Скопје најпрво поднесе обвинение против четири лица, а потоа и за првоосомничениот Љупчо Палевски за кого се чекаше екстрадиција од Турција, за двојното грабнување и свирепо убиство на 14-годишната Вања Ѓорчевска од Скопје и 74-годишниот Панче Жежовски од Велес.

Основниот кривичен суд ги одобри во целост обвиненијата и на барање на Обвинителството ги спои во една постапка во која покрај Палевски, обвинети се и Боре Видевски, Велибор Манев и Влатко Кешишов, како и таткото на девојчето, Александар Ѓорчевски.

Во врска со овој случај е осомничено уште едно лице за помагање по извршување на кривичното дело против кого постапката ќе се води одвоено.

Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.