INFOMAX.MK

Политичката нестабилност во Бугарија во 2020 година директно и негативно влијаела на севкупното спроведување на правата на малцинствата, се наведува во новиот извештај на Советодавниот комитет на Рамковната конвенција на Советот на Европа за заштита на Националните малцинства. Според извештајот, во Бугарија недостасува свест за малцинските права, како составен дел на човековите права и потребни се напори за борба против предрасудите и стереотипите поврзани со малцинствата.

-Ромите сè уште се соочуваат со многу пречки, принудни иселувања, несоодветно домување, невработеност (особено кај жените), севкупна здравствена состојба и недостаток на документи за идентификација, што ја попречува нивната целосна еднаквост и вклучување во бугарското општество. Финансирањето на културните активности останува многу ограничено. Освен правото два часа неделно да се учи „мајчинот јазик“ на основното образование, нема други можности за учење на малцинските јазици на училиште – констатира извештајот.

Советодавниот комитет даде неколку препораки до бугарските власти. Комитетот препорачува да го решат недостатокот на документи за идентификација, особено кај лицата кои припаѓаат на ромското малцинство. Властите треба да изнајдат, без понатамошно одлагање, ефективни решенија за лицата без редовна постојана адреса за да можат и тие да ги добијат своите лични документи.

-Како уште една препорака за итна акција, Советодавниот комитет ги повикува властите да обезбедат доволно, наменски и одржливо долгорочно основно финансирање за зачувување и промовирање на културите и идентитетите на лицата кои припаѓаат на националните малцинства, со посебен фокус на нумерички помалите. Мора да се преземат дополнителни конкретни чекори за подобрување на знаењето кај мнозинското население за бугарските национални малцинства со цел да се прифатат како составен и ценет дел од бугарското општество. Сè уште се потребни активни напори од страна на властите за борба против предрасудите и стереотипите на малцинствата, вклучително и преку систематска обука на полицијата за спречување на насилството врз Ромите од страна на полицијата и обезбедување на темелна и независна истрага за сите случаи на полициско насилство врз Ромите – се додава во соопштението.

Советодавниот комитет, исто така, ги повикува властите да го промовираат учењето на јазиците на малцинствата. Нивото на побарувачка за настава на турски, ромски, ерменски и хебрејски јазици во областите каде што живеат во значителен број лицата на овие малцинства треба редовно да се оценува и да се обезбеди континуитет на наставата на овие и другите јазици на малцинствата од предучилишното до високото образование. Треба да се поттикне производството на образовни материјали на јазиците на малцинствата и да се воведе обука на наставници на универзитетско ниво, особено на ромски.

Други препораки вклучуваат употреба на јазиците на малцинствата во контактите со администрацијата и за време на изборните кампањи, како и потребата да се обезбеди тековно и ефективно учество на лицата кои припаѓаат на националните малцинства во процесите на донесување одлуки.

Извештајот нотира дека состојбата со домување на Ромите треба да се подобри, вклучително и преку гарантирање на нивниот пристап до вода за пиење и електрична енергија, како и до сите други јавни услуги. Треба да се обезбедат безбедни услови за живеење, имајќи ги предвид и ризиците од отсуството на правна сигурност на владеењето, и да се обезбеди соодветно алтернативно сместување во случаи на уривање на ромски населби. Ваквите уривања треба да бидат последно средство и треба да ги почитуваат основните принципи на владеење на правото.