Захарова: Франција ја подготвува својата војска за конфликт со Русија

Портпаролката на руското Министерство за надворешни работи Марија Захарова изјави дека францускиот претседател Емануел Макрон ја подготвува својата војска за конфликт со Русија, пренесe АА.

На брифингот во Москва, Захарова го коментираше неодамнешното обраќање на Макрон до вооружените сили, каде што рече дека безбедносната линија на Франција оди „преку границите во Европа и Украина“.

„Прашувате какви цели има Емануел Макрон… Јасно е дека Париз се подготвува за понатамошно соочување со нашата земја“, нагласи Захарова.

Таа посочи дека Франција со години ги зајакнува своите воени капацитети и дека во 2022 година Макрон ја објави својата намера да ги подготви вооружените сили за „војување со висок интензитет“ и да ја префрли економијата на „воена основа“. По ова, додаде таа, следеше нов закон за воено планирање, кој го удвојува францускиот буџет за одбрана.

Захарова рече дека развојот на напредно оружје е во тек, а многу од оружјата се тестираат во Украина, што таа го опиша како „тест за хибридната војна на Западот против Русија“.

Таа го критикуваше недостатокот на мировни иницијативи од Франција, велејќи дека тоа е дополнителен доказ за „воинствените намери“ на Франција.

Тврди дека француската младина се подготвува за конфликт со Русија под превезот на доброволни мерки.

Во оваа смисла, таа прави споредба со Украина, предупредувајќи дека таквите мерки на крајот би можеле да станат задолжителни.

Захарова, исто така, рече дека Макрон не ја претставува само Франција, туку и таканаречената „милитарна страна“ во НАТО, чија цел е да го продолжи украинскиот конфликт и да ги негира легитимните безбедносни интереси на Русија.

Захарова се осврна и на изјавите на француските власти за потенцијалното распоредување на војници на НАТО во Украина, било како инструктори, воен персонал или под маската на мировните сили.

Share on Facebook

Tweet

Follow us

Save