Многу ветувања, мал напредок за косовската економија

Косовскиот премиер Албин Курти, кога ја презентираше програмата на својата Влада во мај 2021 година, меѓу другото изјави дека големиот потенцијал за производство на храна во Косово треба да се искористи не само за внатрешни потреби, туку и за извоз. Тој рече дека ќе се занимава со набавка на производна и преработувачка механизација за извоз, како и дека ќе им помогне на компаниите да најдат пазари за извоз.

Како дел од поддршката на бизнисите, тој најави дека Косово ќе формира своја банка за развој. „Тоа ќе биде механизам за поддршка на приватниот сектор и промоција на инвестициите. Ќе има кредитна компонента која ќе се финансира од јавни фондови и продажба на обврзници, ќе инвестира во одредени индустрии кои отвораат работни места и го подобруваат трговскиот биланс“, рече Курти во 2021 година, анализира Коссев.

Четири години подоцна оваа банка не е формирана, а трговскиот биланс не е значително променет. Податоците на Агенцијата за статистика на Косово и Царината покажаа дека во 2021 година вредноста на извозот на Косово изнесува 775,7 милиони евра, додека увозот изнесува 4,6 милијарди евра. Во 2024 година извозот е зголемен на 990,2 милиони евра, но и увозот на 6,3 милијарди евра. А, Курти води кампања за изборите на 9 февруари – каде што ќе се кандидира за втор мандат како премиер од Движењето Самоопределување – повторно дава слични ветувања.

„Ќе понудиме поддршка до една милијарда евра за средни и големи инвестиции во производствени компании низ Косово. Ќе го зголемиме производството, ќе ги зголемиме инвестициите, ќе овозможиме реинвестирање и ќе го зголемиме извозот“, рече Курти на средбата на неговите поддржувачи во Ѓаковица. Слични ветувања даваат и неговите противници.

Share on Facebook

Tweet

Follow us

Save