Руте: Ова се неизвесни времиња

Ова се неизвесни времиња и знам дека некои можеби се загрижени за иднината на НАТО, но трансатлантските односи и партнерство остануваат основа на Алијансата, порача денеска генералниот секретар на НАТО, Марк Руте по средбата со полскиот претседател Анджеј Дуда во Брисел.

-Додека сојузниците работат на зголемување на нивните инвестиции во одбраната, многумина работат и на тоа како може да придонесат за праведен и траен мир за Украина. Сите сакаме да видиме крај на руската агресија и договор кој обезбедува траен мир за суверена Украина, додаде Руте.

Тој нагласи дека американскиот претседател Доналд Трамп јасно ја истакнал посветеноста на САД и неговата лично заложба кон НАТО, но исто така и јасно порачал дека очекува Европа да направи повеќе во однос на трошоците за одбраната.

-Веќе гледаме придвижување во вистинската насока. Минатата година, инвестициите во одбраната на Европа и Канада се зголемија за 20 отсто. Истовремено, сојузниците активно работат на тоа како можат да направат повеќе, истакна Руте.

Тој потсети дека само во последните неколку недели Данска и Велика Британија најавија големи инвестиции во одбраната, а важни чекори во тој правец презеле и Германија, Франција и Чешка.

-Го поздравувам ова, бидејќи заедничката безбедност е наша колективна одговорност, додаде Руте.

Share on Facebook

Tweet

Follow us

Save