Членките на ЕУ во среда треба да гласаат за контрамерки на американските царини

Членките на Европската унија во среда, на 9 април, треба да гласаат за контрамерки на американските царини за челик и алуминиум, изјави денеска висок функционер на ЕУ.
Овој предлог на Комисијата ќе биде усвоен доколку не се спротивстави квалификувано мнозинство од 15-те земји-членки, кои претставуваат 65 отсто од населението на ЕУ, пренесува Ројтерс.

Претходно денеска претседателката на Европската комисија, Урсула фон дер Лајен, остро ги критикуваше новите американски царини и најави дека ЕУ веќе подготвува контрамерки.

„Европа е во завршна фаза од првиот пакет мерки како одговор на првите царини за челикот, а ние подготвуваме и дополнителни мерки доколку преговорите не дадат резултати“, рече Фон дер Лајен.

Американскиот претседател Доналд Трамп воведе реципрочни царини за повеќе од 180 земји и територии во светот, вклучително и царина од 20 отсто за стоки увезени од ЕУ.

Администрацијата на Трамп, која го прогласи 2 април за „Ден на ослободувањето“, воведе и царини од 25 отсто за увоз на сите автомобили од странско производство.

Тие доаѓаат по царините од 25 проценти кои веќе се воведени за челик и алуминиум.

Share on Facebook

Tweet

Follow us

Save