Пронајдени рачни бомби во село Боговиње

На бројот за итни случаи 112 во Центарот за управување со кризи (ЦУК) е пријавено пронаоѓање рачни бомби на приватна нива во близина на „Еко Флор Плус“ во село Боговиње.

Како што информира денеска ЦУК, веднаш по примањето на пријавата, вработени од Полициската станица Камењане пристигнале на местото.

– Известени беа и ДЗС Тетово за случајот, а преку консултација со надлежните органи, беше утврдено дека за отстранување на рачните бомби ќе пристапат специјализирани лица од Куманово. Поради стемнувањето, акцијата е одложена за денеска, при што местото е привремено обезбедено од страна на ПС Камењане, додека не се отстранат рачните бомби, стои во соопштението.

РЦУК Битола ја пренесува информацијата од пиротехничар од ДЗС дека вчера има подигнато авионска бомба со 154 калибар (од американско производство) од Првата светска војна.

– Бомбата е безбедно отстранета, подигната во 11:45 часот во село Армаруш, Општина Новаци, се наведува во соопштението од ЦУК.

Share on Facebook

Tweet

Follow us

Save