Трагедија во Србија: Петмина починаа откако паднаа во септичка јама

Во селото Топола, во централниот дел на Србија, вчера попладне се случи тешка трагедија на семејна фарма, при што пет лица го загубија животот. Според српските медиуми, трагедијата се случила кога еден маж паднал во септичка јама, а останатите членови на семејството се обиделе да му помогнат, но за жал и тие починале. Причина за смртта, според првичните информации, е гушење со амонијак кој се ослободил од јамата.

Четири лица починале на самото место, додека петтата жртва — жена која била во критична состојба — подоцна им подлегнала на повредите во болницата во Аранѓеловац.

Меѓу загинатите се дедото, бабата, синот, внукот и еден сосед на семејството. Најмладиот меѓу нив бил 20-годишниот Филип Јокиќ, студент на Економскиот факултет во Крагуевац. Факултетот се прости со него со емотивна порака, нарекувајќи го неговото заминување „голема загуба не само за семејството, туку и за целата академска и локална заедница“.

Оваа трагедија уште еднаш ги потсетува граѓаните на опасностите од нехигиенски и небезбедни услови во домашните септички системи и потребата за внимателност и професионален пристап во случај на вакви инциденти.

Share on Facebook

Tweet

Follow us

Save