Поради напад со дронови беа затворени аеродромите во Москва, откажани над 140 летови

Поради голем напад со украински беспилотни летала врз Русија, големите аеродроми во Москва беа привремено затворени, што доведе до откажување на најмалку 140 летови, соопштија официјални лица.

Според руското Министерство за одбрана, од саботата наутро биле соборени повеќе од 230 украински беспилотни летала над руска територија, од кои 27 над главниот град.

Руската агенција за воздухопловство соопшти дека биле погодени четирите главни аеродроми што ја опслужуваат Москва, а повеќе од 130 летови биле пренасочени. Сите аеродроми во меѓувреме продолжиле со нормална работа. Руското здружение на тур-оператори соопшти дека московските аеродроми биле затворени десет пати во рок од 24 часа поради нападите.

Погоден бил и регионот Калуга, југозападно од Москва, каде што, според руското Министерство за одбрана, биле пресретнати 45 беспилотни летала, што довело до привремено затворање и на меѓународниот аеродром во Калуга. Беспилотни летала биле соборени и над регионите во близина на украинската граница, вклучувајќи ги Ростов и Брјанск, како и над Црното Море, при што не се пријавени жртви во Русија.

Во меѓувреме, најмалку три лица загинаа во руски воздушни напади врз Украина во текот на ноќта, соопштија регионалните власти.

Ова не е првпат украинските напади со беспилотни летала да предизвикаат нарушувања во сообраќајот во Русија. Во мај, најмалку 60.000 патници останаа заглавени на аеродромите низ земјата, откако Киев лансираше повеќе од 500 беспилотни летала во период од 24 часа.

Share on Facebook

Tweet

Follow us

Save