Судењето за „Пулс“ ќе биде маратонски процес, предупредуваат експертите: Со 37 обвинети и над 250 оштетени, секое отсуство ќе значи одложување

По потврдувањето на обвинението за трагедијата во кочанската дискотека „Пулс“, правните познавачи предупредуваат дека јавноста треба да се подготви за долг, сложен и исцрпувачки судски процес, кој носи сериозни логистички и правни предизвици. Со 37 обвинети, 33 адвокати и повеќе од 250 оштетени лица, секое рочиште ќе биде тешко за организирање, а секое отсуство ќе значи ново одложување.

Иако очекувањата на јавноста се насочени кон брза правда за 62-те жртви, искуството со вакви сложени предмети покажува дека тие ретко се решаваат во кратки рокови.

Правниот аналитичар Аврамовски во изјава за МРТ оценува дека обвинението ќе биде тешко докажливо за обвинителството. Според него, предизвик ќе биде да се докаже дека сите обвинети, кои се товарат за тешки дела против општата сигурност, го сториле делото заеднички, како што се тврди во обвинителниот акт.

Овие анализи доаѓаат откако Советот за оценка на обвинителниот акт при Кривичниот суд го потврди во целост обвинението против 37-те лица, со што се создадоа услови за закажување на почетокот на судењето.

Share on Facebook

Tweet

Follow us

Save