INFOMAX.MK

Во делот на зеленилото и хигиената, нудиме системско решение. Ќе почнеме со редовно одржување на јавните површини, нема да чекаме проблемот да ескалира, вегетацијата да нарасне до тој степен да не можат општинските служби па да изнајмуваат тримери за 1200 денари од час, истакна во гостуваење во Вистинска телевизија кандидатот за градоначалник на Општина Ѓорче Петров од СДСМ, Костадин Ацевски.

„Потребно е редовно одржување на зелените површини, ќе изнајмуваме дополнителни ресурси за справување со отпадот во случај на затајување на работата на ЈП Комунална хигиена. И сега Ѓорче Петров изнајмува камиони, но тие се плаќаат од час, а Ѓорче повалкано никогаш не било. Она што ќе го направиме е за почеток, таквите камиони да се плаќаат по учинок, односно по количина на собран отпад и депониран во Дрисла, така кажува економската логика“, вели Ацевски.

Тој нагласи дека потребна е комуникација со Градот Скопје и останатите институции, меѓутоа искуството покажа дека Општината мора сама да биде спремна да се справи со проблемите во секакви ситуации.