Белата куќа со критики кон Нобеловиот комитет: „Политиката ставена над мирот“

Белата куќа ја критикуваше одлуката на Комитетот за Нобелова награда за мир да ја додели наградата на лидерката на венецуелската опозиција, Марија Корина Мачадо, наместо на американскиот претседател Доналд Трамп. Нобеловиот комитет докажа дека ја става политиката над мирот, изјави портпаролот на Белата куќа, Стивен Чеунг.

„Претседателот Трамп ќе продолжи да склучува мировни договори, да ги прекинува војните и да спасува животи. Тој има срце на хуманитарец и никогаш нема да има некој како него што може да поместува планини само со својата волја“, напиша тој во објава на социјалната мрежа X.

Трамп постојано нагласуваше дека би му значело многу да ја освои Нобеловата награда за мир бидејќи, како што рече, од јануари запрел осум војни, вклучувајќи го и конфликтот меѓу Израел и Хамас во Појасот Газа.

Нобеловите награди се доделуваат од 1901 година како фондација на пронаоѓачот Алфред Нобел. Наградата за мир е единствената што ја доделува норвешки комитет, додека комитет од Шведска е одговорен за сите други категории.

Share on Facebook

Tweet

Follow us

Save