INFOMAX.MK

Генералниот секретар на НАТО, Марк Руте, денес на индустрискиот форум во Букурешт изјави дека алијансата ја престигнала Русија во производството на муниција и мора да биде подготвена за долгорочна конфронтација, јавуваат западните медиуми.

Руте рече дека земјите од НАТО сега произведуваат повеќе муниција отколку во претходните децении, објави веб-страницата на алијансата.

„До неодамна, Русија произведуваше повеќе муниција отколку сите земји-членки на НАТО заедно. Но, тоа веќе не е случај. Низ целата Алијанса, моментално отвораме десетици нови производствени линии и ги прошируваме постојните“, рече Руте.

Според него, таков напредок мора да се постигне и во други области – од висококвалитетни системи за воздушна одбрана до евтини дронови-пресретнувачи.

Руте нагласи дека креативноста е еден од движечките фактори во развојот на оружјето.

„Мора да ги надмудриме нашите противници, користејќи ја целата наша моќ за да останеме безбедни во иднина“, рече Руте.

Тој рече дека отворениот дијалог меѓу НАТО и индустријата е клучен.

„Неиспровоцираната војна на Русија против Украина е највидливиот пример за заканата. Но, опасноста што ја претставува Русија нема да заврши кога ќе заврши оваа војна. Во догледна иднина, Русија ќе остане дестабилизирачка сила во Европа и во светот. И Русија не е сама во своите напори да ги поткопа глобалните правила“, рече Руте, додавајќи дека НАТО мора да биде подготвена за долгорочна конфронтација.

Индустрискиот форум на НАТО 2025 собира 900 учесници, опфаќајќи 300 настани, а Руте го опиша како еден од најголемите настани од ваков вид.