Кочани утре повторно на улица: „Маршот на ангелите“ како повик за правда и совест

Родителите на загинатите во трагедијата во „Пулс“ упатија повик до јавноста да им се приклучи на 29 ноември во 14:05 часот на 29. издание на „Маршот на ангелите“, кој ќе започне од Паркот на револуцијата во Кочани.

Настанот е најавен како мирен и достоинствен собир, посветен на жртвите и како потсетник дека зад секоја судска одлука стојат вистински човечки животи и семејства што сè уште ја чекаат правдата што им следува.

Организаторите нагласуваат дека маршот не е протест, туку глас против неправдата – повик општеството да не заборави и институциите да покажат совест и одговорност.

Паралелно со подготовките за маршот, во Кривичниот суд во Идризово повторно беше одложено рочиштето за случајот „Пулс“. Дел од адвокатите на одбраната соопштија дека немаат добиено интегрирано обвинение, поради што не можат да се изјаснат за вината ниту да настапат со воведни зборови. Неколку бранители предупредија дека обвинителниот акт содржи измени кои, според нив, директно ги засегаат правата на одбраната.

Оштетените лица едногласно се приклучија кон кривичниот прогон и повторно побараа проширување на истрагата, со вклучување на потенцијална одговорност и кај институциите.

На рочиштето беа презентирани и нови податоци за здравствените последици кај преживеаните од пожарот. Иако првично не покажувале видливи повреди, дел од нив во изминатите месеци развиле респираторни проблеми, хроничен замор и други сериозни симптоми, кои лекарите ги поврзуваат со долготрајното изложување на чад и токсични материи за време на трагедијата.

Пожарот во „Пулс“, во кој загинаа 63 лица и повеќе од 200 беа повредени, сè уште тежи врз заедницата. Семејствата повторуваат дека бараат јасна одговорност, системска поддршка и реформи во безбедносните стандарди.

Маршот што ќе се одржи на 29 ноември е нивниот начин да потсетат дека борбата за правда продолжува, а довербата во институциите мора да биде заслужена, не претпоставена.

Share on Facebook

Tweet

Follow us

Save