Масовни протести против Фицо во Словачка

Илјадници луѓе учествуваа во протестите во Словачка синоќа против промените во судството за кои опозициските политичари и критичари велат дека го уништуваат владеењето на правото во земјата-членка на ЕУ, објавија Ројтерс и БТА, повикувајќи се на словачките медиуми.

Демонстрантите исполнија голем дел од централниот плоштад во главниот град Братислава, а демонстрации се одржаа во осум други градови. Главната опозициска партија, Прогресивна Словачка, го организираше протестот откако левичарската националистичка влада на премиерот Роберт Фицо минатата недела ги протурка законските измени во парламентот со кои ќе се затвори независна агенција што ги штити информаторите и ќе се промени начинот на кој државата се однесува кон заштитените сведоци.

„Тие го уништија владеењето на правото“, се гледа како лидерот на Прогресивна Словачка, Михал Шимечка, им кажува на демонстрантите во Братислава во видео објавено на интернет. Луѓето мавтаа со словачки и знамиња на ЕУ, креваа слогани како „Владата на Фицо ѝ помага на мафијата“ и скандираа „Доста, Фицо“ и „Срам!“

Администрацијата на словачкиот премиер тврди дека агенцијата се вклучила во политички злоупотреби. Властите, исто така, го ослабнаа кривичното законодавство за финансиски криминал, ги реформираа јавните медиуми и протуркаа уставни измени што потврдуваат национален суверенитет над дел од законодавството на ЕУ, привлекувајќи го вниманието на Европската комисија. Уставниот суд на Словачка во вторник вечерта ја запре планираната владина реформа на Агенцијата за заштита на лицата што пријавуваат корупција и други криминални активности, објави Ројтерс.

Минатата недела, Европската комисија соопшти дека жали што словачкиот парламент не одржал длабински консултации, потсетувајќи дека претходно изразила силна загриженост за законските измени. Откако дојде на власт во 2023 година, се одржаа неколку големи протести против владата на Фицо, а денешните демонстрации беа едни од најголемите од минатиот февруари, кога десетици илјади луѓе протестираа против „надворешната политика на земјата за поблиски односи со Русија“.

Share on Facebook

Tweet

Follow us

Save