Протест на француските земјоделци пред резиденцијата на Макрон

Земјоделците се собраа пред резиденцијата на францускиот претседател Емануел Макрон и неговата сопруга Брижит во Ле Туке, изразувајќи го своето незадоволство од договорот со Меркосур и француската земјоделска политика.

Демонстрациите започнаа во 5:30 часот утрово и беа организирани од FNSEA, најголемата земјоделска федерација во Франција.

Протестот е дел од поширокото незадоволство во земјоделскиот сектор, кој во последните денови организираше блокади и демонстрации низ југозападна Франција, а некои дури патуваа и во Брисел за да ги искажат своите ставови.

Незадоволството на земјоделците дополнително се засили со одложувањето на потпишувањето на договорот меѓу ЕУ и Меркосур, што го објави претседателката на Европската комисија, Урсула фон дер Лајен, во четврток вечерта. FNSEA го сметаше одложувањето за недоволно и ги повика своите членови да останат на терен, објавија француските медиуми.

Градоначалникот на Ле Туке, Даниел Фаскел, изјави за BFMTV дека земјоделците и локалните власти сметаат дека не се доволно заштитени од Меркосур и не ја разбираат позицијата на Франција.

Тој додаде дека земјоделците и тој „имале тешкотии да поверуваат“ во ставовите на Макрон за договорот.
Протестите одразуваат комбинација од загриженост во врска со меѓународниот трговски договор, појава на заразна дерматоза и пошироко незадоволство од третманот на земјоделството во Франција.

Според дипломатски извор од ЕУ, Урсула фон дер Лајен ги информирала лидерите на ЕУ на самитот во Брисел во четврток дека трговскиот договор со Меркосур нема да биде потпишан во сабота како што беше претходно планирано, туку ќе биде одложен до следниот месец.

Француските земјоделци се противат на потпишувањето договор со земјите од Меркосур, јужноамерикански трговски блок чии полноправни членови се Аргентина, Бразил, Парагвај и Уругвај, и веруваат дека францускиот претседател Макрон е неодлучен по ова прашање.

Share on Facebook

Tweet

Follow us

Save