(Видео) Една година по трагедијата: „Супорт Кочани“ со видео за солидарноста што не згасна

Една година по трагедијата во Кочани, граѓанската иницијатива „Супорт Кочани“ објави видео-компилација од активностите што ги реализираше во изминатиот период, помагајќи им на повредените и на семејствата на настраданите.

Од првиот ден по несреќата, волонтерите работеа деноноќно, организирајќи хуманитарни акции, собирајќи финансиски средства и воспоставувајќи систем за координација на помошта. Беа креирани апликации за донации и веб-страница преку која граѓаните и донаторите можеа директно да се вклучат.

Дел од активностите беа насочени и кон здравствениот систем, со донации за болницата, како и обезбедување креми и неопходни средства за третман на повредените.

„20.03.2025 – На овој ден пред една година се роди иницијативата ‘Супорт Кочани’. Од идеја да се помогне, до организација која сè уште неуморно работи за подобро Кочани. Фала ви на сите кои на било кој начин помогнавте на засегнатите од трагедијата во Кочани. И на сите кои помогнавте ‘Супорт Кочани’ да опстои“, стои во нивната објава.

Видео-компилацијата е силен потсетник за солидарноста што се мобилизираше по трагедијата, но и за континуираната улога на граѓанските иницијативи во поддршката на заедницата, особено во моменти кога институционалниот одговор е бавен или недоволен.

„Супорт Кочани“ денес прераснува во пример како спонтаната човечка реакција може да се трансформира во организирана и одржлива помош, која носи реална поддршка и надеж за погодените семејства.

Share on Facebook

Tweet

Follow us

Save