Снежен хаос во Хрватска: Затрупани автопати и пораки со предупредување до граѓаните

Силен снежен бран и интензивни ветрови ја зафатија Хрватска, предизвикувајќи сериозни проблеми во сообраќајот, особено во планинските региони, пренесува хрватски Индекс.

Автопатот низ Горски Котар е затрупан со снег, а зимските служби се постојано на терен за расчистување. Поради влошените услови, Хрватски авто-клуб (ХАК) издаде посебни предупредувања до возачите.

Утринава во 6 часот, граѓаните добија порака од Цивилната заштита со апел за зголемена претпазливост поради обилните снежни врнежи, како и линк за следење на актуелната состојба.

Зимски услови владеат на дел од патиштата во Горски Котар и Лика, додека на крајбрежјето дува силен ветер. Поради тоа, воведени се ограничувања за одредени категории возила, а сообраќајот за камиони со приколки и шлепери е целосно запрен.

Чистењето и посипувањето на патиштата се одвива на повеќе делници, но на некои места сообраќајот е забавен поради присуство на механизација.

Надлежните апелираат возачите да бидат внимателни, да одржуваат безбедно растојание и да не тргнуваат на пат без задолжителна зимска опрема.

Според прогнозите, времето во текот на денот ќе биде нестабилно, ветровито и значително постудено, особено во внатрешноста на земјата. Ќе преовладува облачно време со повремени врнежи од дожд, локално и поројни врнежи проследени со грмежи, додека на Јадранот се очекуваат пообилни врнежи.

Во внатрешноста, дождот на места ќе преминува во лапавица, а во повисоките и планинските подрачја – во снег.

Share on Facebook

Tweet

Follow us

Save