Шефот на одбраната на Уганда не отстапува: Бара една милијарда долари од Турција и брак со најубавата Турчинка

Шефот на одбраната на Уганда и син на претседателот на земјата, Мухузи Кајнеругаба, побара 1 милијарда долари од Турција и брак со „најубавата жена“ во Турција за, како што тврди, придонес кон регионалната безбедност, со закана за прекин на дипломатските односи, објавува „Танјуг“.

Кајнеругаба, во серија објави на социјалната мрежа „Икс“, се закани дека Уганда ќе ги прекине дипломатските односи и ќе ја затвори турската амбасада во Кампала во рок од 30 дена доколку не бидат исполнети барањата.

Во своите објави тој тврдеше дека Турција има корист од деловните и инфраструктурните проекти во Сомалија, вклучувајќи ги пристаништата и аеродромите во Могадишу, додека Уганда, тврди тој, со години носи тежок безбедносен товар, објавува во понеделник NDTV.

Кајнеругаба рече дека Уганда треба да добие 1 милијарда долари како „безбедносна дивиденда“, со порака дека, во спротивно, ќе ја затвори турската амбасада.
Во истите објави, тој, исто така, упати контроверзно барање Турција „да му ја предаде најубавата жена во земјата“ за да може да се ожени со неа.

Тој предупреди дека односите меѓу Уганда и Турција не треба да се сведуваат на „игри на социјалните медиуми“, но во исто време најави можност за непосредно прекинување на дипломатските врски.

Каинеругаба, исто така, им советуваше на Уганѓаните да избегнуваат патување во Турција, од безбедносни причини.

Во своите објави, тој, исто така, изрази поддршка за Израел, наведувајќи дека е подготвен да испрати 100.000 угандски војници за да ја заштитат Светата Земја.

Ова не е прв пат Кајнеругаба да привлече внимание во јавноста со своите необични изјави, бидејќи во 2022 година понуди, како што изјави, 100 крави за брак со италијанската премиерка Џорџа Мелони.

Share on Facebook

Tweet

Follow us

Save