Расте тензијата – Иран очекува можен нов напад од САД: „Подготвени сме за сè“

Иран е подготвен за можноста од обновување на воени конфликти, пренесува иранската новинска агенција Тасним, повикувајќи се на анализа на актуелните активности на САД во регионот.

Според наводите, во последните денови е забележано засилено американско воено присуство, вклучително и движење на воени бродови, воспоставување „воздушен мост“ за транспорт на опрема, како и ангажирање на тешки транспортни авиони од типот Ц-5 и Ц-17. Дополнително, се споменуваат воени вежби за заземање острови во Бахреин, зголемена активност на извидувачки беспилотни летала и преместување на системи за воздушна одбрана.

Анализата посочува дека Техеран разгледува две можни сценарија. Првото е дека САД со овие потези вршат психолошки притисок со цел да изнудат отстапки во преговорите. Иран, според истите извори, останува на своите позиции и не планира да попушти под притисок.

Второто сценарио, оценето како посериозно, е дека дипломатските контакти служат како прикритие за подготовка на изненадувачки воен удар, особено насочен кон иранските острови. Во овој контекст, Техеран потсетува на претходни искуства и го обвинува Вашингтон за користење на преговорите како средство за стратегиска измама.

Според Тасним, во моментов во Иран преовладува проценката дека ризикот од нов конфликт е поголем од шансите за продолжување на преговорите. Се нагласува дека земјата е целосно подготвена за таков развој, а во случај на напад врз нејзината инфраструктура, би можела да се откаже од досегашната воздржаност во регионот, вклучително и во чувствителни точки како Баб ел-Мандеб и енергетските капацитети на Блискиот Исток.

Share on Facebook

Tweet

Follow us

Save