INFOMAX.MK

Товарен брод поврзан со Грција беше нападнат во близина на Ормутскиот теснец, но сè уште не е јасно дали Иран го заплени, изјави грчкиот министер за надворешни работи Јоргос Герапетритис.

Во разговор за емисијата „Connect the World“ на Си-Ен-Ен, Герапетротис рече: „Можам да потврдам дека имало напад врз грчки товарен брод, но не можам да потврдам дека бил запленет од Иранците“.

Тој ја опиша ситуацијата како „доста загрижувачка“ и ги повика сите бродови во грчка сопственост да избегнуваат поминување низ оваа клучна морска рута.

– Станува збор за брод под либериско знаме, во сопственост на Грција, кој се обидуваше да го напушти Ормутскиот теснец – додаде Герапетритис.

– Издадовме општо предупредување до сите бродови во грчка сопственост да бидат исклучително внимателни, да покажат максимална воздржаност и да избегнуваат преминување на теснецот – додаде тој.

Според иранските медиуми, бродот бил еден од трите што биле цел на иранската Револуционерна гарда.

Два други брода биле запленети и пренасочени во иранските територијални води, објави оваа формација.