INFOMAX.MK

Амбасадорот на САД во НАТО, Метју Витакер, за време на посетата на Албанија, заедно со министерот за одбрана Ермал Нуфи, ја посети воздухопловната база Кучово, која е целосно реновирана со средства од НАТО.

Како што соопшти Амбасадата на САД, на средбата било разговарано за подготвеноста на Албанија да се позиционира како логистички центар на НАТО во регионот, преку инвестиции во Коридорот осум, како и за можностите за зајакнување на регионалната безбедност преку зголемување на трошоците за одбрана.

Витакер се сретна и со премиерот Еди Рама, кој посочи дека разговорите биле фокусирани на стратешкото партнерство меѓу двете земји.

„Разговаравме за блиската врска и стратешкото партнерство меѓу нашите држави, нашите одлични дипломатски и воени односи, чие зајакнување е заеднички приоритет. Исто така разговаравме и за следниот самит на НАТО кој идната година ќе се одржи во Тирана“, напиша Рама.

Во рамки на посетата, Витакер се сретнал и со американски и албански маринци и персонал кои учествувале во НАТО операциите во Авганистан и Ирак.

Од Амбасадата на САД нагласуваат дека партнерството меѓу Албанија и САД останува клучно за заштита на заедничките вредности.