ЕУ го изгласа најстрогиот миграциски закон во последните децении

Најстрогиот миграциски закон во последните децении доби зелено светло во Европскиот парламент, со што Европската унија влегува во нова, далеку поцврста фаза на миграциската политика. Новата регулатива треба да го забрза враќањето на мигрантите кои немаат законско право да останат во ЕУ, а беше изгласана со поддршка од десниот центар и крајнодесничарските групи во парламентот.

Законот беше усвоен со 418 гласа „за“, 218 „против“ и 30 воздржани. Гласањето ја потврди новата политичка математика во Европскиот парламент: Европската народна партија повторно се потпре на десничарски и крајнодесничарски гласови за да помине построга миграциска легислатива.

Најконтроверзниот дел од законот е можноста земјите членки на ЕУ да воспоставуваат центри за враќање надвор од Унијата, преку договори со трети земји. Во тие центри би можеле да бидат испраќани мигранти што немаат право да останат во ЕУ, додека чекаат враќање во земјата на потекло или во друга држава што би ги прифатила.

Според Euronews, од оваа мерка би биле изземени само малолетници без придружба. Семејства со деца, пак, би можеле да бидат префрлани во такви центри, што веќе предизвикува остри реакции кај левицата, социјалдемократите и организациите за човекови права.

Законот носи и поголеми овластувања за лоцирање нерегуларни мигранти. Една од спорните одредби овозможува претрес на место на живеење или други релевантни простории поврзани со лицата што треба да бидат вратени. Невладините организации ваквата мерка ја споредуваат со агресивни полициски практики против мигранти.

Построги стануваат и правилата за притвор. Максималниот период на задржување на мигранти кои чекаат враќање се зголемува од шест месеци на две години, со можност за дополнително продолжување од шест месеци. За лица што се сметаат за безбедносен ризик, задржувањето може да трае и без временско ограничување.

Влезните забрани исто така се заоструваат. Наместо досегашните пет години, забраната за влез во ЕУ во најголем дел од случаите ќе може да трае до десет години. За лица оценети како безбедносен ризик, законот отвора можност и за доживотна забрана.

Се менува и жалбената постапка. Досега депортацијата автоматски се суспендираше додека трае правниот спор. Новата регулатива го укинува тоа правило, па судовите ќе одлучуваат од случај до случај дали наредбата за враќање ќе биде запрена додека се разгледува жалбата.

Поддржувачите на законот го претставуваат како неопходен чекор за враќање ред во миграциската политика и за побрзо спроведување на одлуките за депортација. Противниците, пак, предупредуваат дека ЕУ ризикува да нормализира практики што до пред неколку години би биле незамисливи во европскиот правен простор.

Со ова гласање, миграцијата повторно стана линија на политичко прегрупирање во Брисел. Наместо старата центристичка формула меѓу народњаците, социјалдемократите и либералите, овојпат пресуди десно мнозинство што бара побрзи враќања, подолги задржувања и поголеми овластувања за државите.

Share on Facebook

Tweet

Follow us

Save