Климата ќе троши три пати повеќе струја, ако не престанете со една навика

Во летните горештини, клима-уредите се најбрзото и најпрактичното решение за разладување на домот. Сепак, голем број граѓани, во обид да заштедат на сметките за електрична енергија, ја вклучуваат климата само повремено – по неколку минути или часови во текот на денот. Според експертите, токму ова е една од најчестите грешки што може да доведе до поголема потрошувачка на струја.

Современите инвертер клима-уреди се дизајнирани да работат поефикасно кога се оставени континуирано да ја одржуваат зададената температура. Откако просторијата ќе се разлади, компресорот автоматски ја намалува моќноста и троши значително помалку електрична енергија отколку кога уредот постојано се исклучува и повторно работи со максимален капацитет.

На пример, инвертер клима со моќност од 3,5 киловати при максимално оптоварување може да троши околу 1,2 киловати електрична енергија, но кога само ја одржува температурата, потрошувачката се намалува на приближно 200 до 500 вати.

Затоа, доколку престојувате дома во текот на целиот ден, препораката е клима-уредот да се вклучи уште во утринските часови, кога надворешната температура е пониска, и да остане да работи без прекин. На тој начин просторот ќе остане пријатно разладен, а уредот ќе троши помалку енергија отколку ако постојано се вклучува и исклучува.

За оние кои поголемиот дел од денот се надвор од домот, добра опција е климата да се активира околу еден час пред враќањето дома. Ова е особено практично ако уредот има вграден Wi-Fi модул, кој овозможува далечинско управување преку мобилен телефон.

Еден од најважните фактори за пониска потрошувачка е и енергетската класа на уредот. Најефикасни се моделите со ознака A+++, потоа A++ и A+, кои обезбедуваат високи перформанси со значително помала потрошувачка на електрична енергија во споредба со постарите модели.

Дополнително, важно е температурата да не се поставува премногу ниско. За време на летните месеци се препорачува клима-уредот да биде наместен на околу 24 до 26 степени Целзиусови, што обезбедува пријатна атмосфера и оптимална потрошувачка на струја. Во зимски услови, кога клима-уредот се користи за греење, најекономично е температурата да биде поставена меѓу 20 и 22 степени.

Со правилен избор на уред, користење на инвертер технологија и континуирано одржување на температурата, домаќинствата можат значително да ги намалат сметките за електрична енергија, а истовремено да обезбедат поголема удобност во домот.

Share on Facebook

Tweet

Follow us

Save