САД и Иран и синоќа се ракетираа

Соединетите Американски Држави извршија нови воздушни напади врз Иран откако ирански напад врз трговски брод во Ормускиот Теснец предизвика пожар и евакуација на екипажот. Според американски информации, Иран возвратил со напади кон Бахреин, Кувајт, Катар и Обединетите Арапски Емирати, дополнително зголемувајќи ги тензиите во регионот.

Американската Централна команда (CENTCOM) соопшти дека погодила околу 140 воени цели, меѓу кои ракетни и дронски позиции, складишта за муниција и комуникациска инфраструктура. Од CENTCOM наведуваат дека целта на операцијата е да се намали способноста на Иран да ги загрозува трговските бродови кои пловат низ Ормускиот Теснец.

Иранската страна порача дека Теснецот останува затворен до понатамошно известување и предупреди на можни нови напади врз американски и сојузнички бази во регионот. Во Катар, Бахреин и Кувајт беа активирани сирени за воздушна опасност, а катарската војска соопшти дека пресретнала повеќе ирански проектили.

Во меѓувреме, министрите за надворешни работи на Иран и Оман разговараа за безбедноста на пловидбата низ Ормускиот Теснец, но без конкретен договор за негово целосно отворање. Американската администрација инсистира Иран јавно да гарантира слободна пловидба, што засега не е прифатено од Техеран.

Американски претставници оценуваат дека кризата околу Ормускиот Теснец сериозно ги загрозува шансите за постигнување траен мировен и нуклеарен договор меѓу Вашингтон и Техеран. И покрај дипломатските напори, двете страни продолжуваат со остри меѓусебни предупредувања и воени активности.

Ормускиот Теснец останува едно од најризичните жаришта во светот поради неговото клучно значење за глобалниот транспорт на нафта и природен гас.

Share on Facebook

Tweet

Follow us

Save