Затвореници цела недела ќе ги чистат магистралните и регионалните патишта во државата

Од денес започна седумдневната работна акција која ќе трае до 22.07.2026 година во соработка со Управата на извршување на санкциите и ЈП Македонија Пат согласно потпишан Меморандум за соработка за работно ангажирање на осудени лица кои ќе помагаат за одржување на хигиената на магистралните и регионалните патишта на целата територија на Република Македонија, информираа од Управата за извршување на санкции.

На денешниот настан увид извршија заменик-директорот на ЈП Македонија Пат, Александар Шуковски, Јован Петров и Љупчо Настоски од Кабинетот на Директорот на УИС, Александар Пандов.

Како што посочија од Управата, во оваа работна акција биле вклучени повеќе казнено-поправни домови и казнено-поправни установи, и тоа: КПД Затвор Идризово, КПД Затвор Штип, КПД Затвор Прилеп, КПУ Затвор Куманово, КПУ Затвор Битола, КПУ Затвор Скопје, КПУ Затвор Гевгелија, КПУ Затвор Струмица и КПУ Затвор Струга.

„Осудените лица кои се работно ангажирани на магистралните и регионалните патишта се во непосредна близина на казнено-поправните установи каде што ја издржуваат својата казна и истите се под постојан надзор на припадниците на затворската полиција“, додаваат од таму.

Share on Facebook

Tweet

Follow us

Save