(Видео) ФИФА воведува историска новина – светските шампиони за првпат ќе добијат шампионски прстени

ФИФА воведува нова традиција на Светското првенство. Победникот на Мундијалот 2026, покрај легендарниот трофеј и златните медали, за првпат во историјата ќе добие и специјално изработени шампионски прстени.

Станува збор за први шампионски прстени што ФИФА ќе ги додели на победниците на едно Светско првенство, со што во најголемото фудбалско натпреварување се воведува традиција препознатлива во северноамериканските професионални лиги како НБА, НФЛ и МЛБ.

Според ФИФА, ќе бидат изработени вкупно 2.026 прстени, симболично во чест на годината на одржување на турнирот. Од нив, 30 ќе бидат резервирани за светските шампиони, додека преостанатите 1.996 ќе бидат достапни за навивачите низ светот како лимитирана колекција.

Новите шампионски прстени нема да го заменат традиционалниот пехар ниту медалите, туку ќе претставуваат дополнително признание за освојувањето на најпрестижната титула во светскиот фудбал. ФИФА оценува дека со ова се создава уште еден симбол на успехот, кој ќе остане траен спомен за играчите и членовите на шампионскиот тим.

Со оваа одлука, Светското првенство 2026 ќе остане запаметено не само како прво издание со 48 репрезентации, туку и како турнир што воведе уште една историска традиција во светскиот фудбал.

Share on Facebook

Tweet

Follow us

Save