INFOMAX.MK

Асфалтирањето на булеварот „Борис Трајковски“ во Скопје ќе започне во наредниот период, најави градоначалникот на Општина Кисела Вода, Орце Ѓорѓиевски, посочувајќи дека во изминатите нешто повеќе од три месеци биле отстранети проблемите што го попречувале продолжувањето на изградбата.

Ѓорѓиевски вели дека трасата сега е целосно ослободена, изградена е нова атмосферска канализација, а завршено е и тампонирањето на едната страна од булеварот. Според него, следен чекор е поставувањето на првиот слој асфалт.

„По три децении празни ветувања, за само нешто повеќе од три месеци ги решивме проблемите што ја кочеа изградбата на булеварот „Борис Трајковски“ и секојдневно создаваа вистинска голгота за повеќе од 100.000 граѓани“, наведува Ѓорѓиевски.

Тој порача дека со реализацијата на проектот жителите на овој дел од Скопје ќе добијат нов, модерен и побезбеден булевар.

„Ветивме и реализираме! Кога се сака – сѐ се може. Скопје го правиме заедно“, порача Ѓорѓиевски.