Брачен пар загина во пожар на островот Саламина во Грција, Белгија се бори со најголемиот шумски пожар

Возрасен брачен пар загина во пожарите на грчкиот остров Саламина во неделата, додека Белгија се бори со најголемиот шумски пожар во својата современа историја, кој беснее во непристапна област во близина на границата со Германија, во најновиот бран шумски пожари што ја зафати Европа, пренесува „Гардијан“.  

Брачниот пар загинал пред својот дом во областа Перистерија, соопшти грчката крајбрежна стража. На повеќе од 500 луѓе им било наредено да се евакуираат.

Во Шпанија, војник загинал во неделата додека учествувал во гасењето на голем шумски пожар во Арагон, соопштија властите.

Француски пожарникари требало да помогнат во спречувањето на ширењето на пожарот во североисточниот регион, кој беснее веќе една недела и се заканува на манастир стар 1.000 години.

Во Белгија, пожарот што избувнал во петокот во природниот резерват Хај Фенс, голема природна област популарна меѓу планинарите, до раните утрински часови во неделата опустошил околу 3.000 хектари (7.400 акри) земјиште и се приближувал до границата со Германија.

Околу 600 жители на општините Вам (Waimes) и Битгенбах (Bütgenbach), во покраината Лиеж, во саботата добиле наредба да ги напуштат своите домови. И на туристите им било советувано да го напуштат подрачјето поради промената на правецот на ветрот и ширењето на чадот.

Од оние кои ја следеле наредбата за евакуација, околу 20 лица ја поминале ноќта во спортска сала, додека други се засолниле кај роднини и пријатели. Гувернерот на Лиеж, Ерве Жамар, изјави дека во операцијата биле вклучени повеќе од 250 пожарникари и припадници на службите за итна помош, меѓу кои и пожарникари од Германија.

Share on Facebook

Tweet

Follow us

Save