Само четири дена се почитувал договорот за откупните цени на пиперката, земјоделците утре повторно на протест

Само четири дена се почитувале договорените откупни цени за пиперката, тврдат земјоделците од Струмичко, кои за утре, 25 август, најавуваат нов протест и блокади поради повторното намалување на цените.

Според објавата на Месното здружение на млади Муртино, веќе пет дена пиперката во струмичкиот регион се откупува по околу 25 денари за килограм, а од фабриките биле најавени и нови пониски цени.

Земјоделците бараат целосно спроведување на договорените откупни цени и класификацијата на пиперката. Тие велат дека во изминатите денови биле во контакт со министерот за земјоделство Борче Серафимовски и повеќепати ја пријавувале состојбата на терен.

Тие потсетуваат дека на состанокот на кој биле договорени откупните цени побарале и писмени гаранции дека фабриките ќе ги почитуваат, но такви гаранции не добиле. Според земјоделците, министерот тогаш јавно најавил дека договорените цени ќе мора да се почитуваат и дека државата ќе реагира доколку преработувачите отстапат од договореното.

Поради незадоволството, утре во 11 часот е најавен масовен земјоделски собир пред подрачната единица на Министерството за земјоделство во Струмица, како и блокади. Тргнувањето е најавено за 10:15 часот, а земјоделците се повикуваат да дојдат и со земјоделска механизација доколку се во можност.

Организаторите нагласуваат дека станува збор за мирен земјоделски протест без партиска позадина.

Share on Facebook

Tweet

Follow us

Save