Грчките земјоделци со трактори ќе протестираат во Солун во исто време кога Мицотакис ќе зборува за економијата на земјата

Грчките земјоделци најавија нов протест на 5 септември во Солун, каде со трактори ќе се соберат во центарот на градот, кај Белата кула.

Протестот е закажан за денот на отворањето на 90. Меѓународен саем во Солун, неколку часа пред традиционалното обраќање на грчкиот премиер Киријакос Мицотакис, кој се очекува да ги претстави економските приоритети и плановите на Владата.

Одлуката за мобилизацијата била донесена на состанок на Панхеленскиот комитет на земјоделските блокади во Неа Малгара. Во протестот се очекува да учествуваат земјоделци од повеќе региони, а најавено е присуство и на сточари, пчелари и рибари.

Главните причини за незадоволството остануваат високите трошоци за гориво и електрична енергија, поскапувањето на ѓубривата, сточната храна и другите репроматеријали, како и проблемите со исплатата на субвенциите и обесштетувањето.

Земјоделските организации сметаат дека производствените трошоци растат побрзо од приходите и предупредуваат дека за дел од производителите земјоделството станува економски неодржливо.

Новата мобилизација следува по повеќемесечните протести и блокади кои започнаа кон крајот на 2025 година и продолжија на почетокот на годинава. Во тој период беа блокирани повеќе патишта и гранични премини, меѓу кои и Евзони, што предизвикуваше проблеми и за патниците од Македонија.

Засега нема најава дека на 5 септември ќе биде блокиран граничниот премин Евзони. Во Солун, сепак, се очекуваат засилени безбедносни мерки и можни ограничувања во сообраќајот поради протестот и отворањето на Меѓународниот саем.

Share on Facebook

Tweet

Follow us

Save