Ангелов: Куќите во Грачани и Никиштане се спасени, огнот под делумна контрола

Авионите на Дирекцијата за заштита и спасување спречија огнена стихија да стигне до куќите во селата Грачани и Никиштане, откако со ризични летови исфрлија три тони вода директно над линијата на пожарот. Директорот на Центарот за управување со кризи, Стојанче Ангелов, соопшти дека селата веќе не се во опасност и најави дека огнот треба да биде ставен под делумна контрола.

Двата ер-трактори на Дирекцијата за заштита и спасување интервенираа во низок лет директно над првите куќи, соборувајќи три тони вода врз активниот оган. Потегот беше ризичен поради неповолниот терен и густиот чад. Сепак, воздушната интервенција успеа навреме да го пресече ширењето на пламените јазици кон населените места.

Околу селата изгоре голема површина вегетација. Скопските пожарникари и специјализираните тимови на ДЗС со возила „пинцгауер“ остануваат распоредени долж огнениот појас за да го спречат неговото повторно разгорување.

Стихијата започна пред три дена откако премина преку косовската граница на македонска територија во општината Ѓорче Петров. Силен ветер синоќа го насочи чадот директно кон Скопје, што предизвика вознемиреност кај жителите во речиси сите градски општини.

„Во овој момент двете села, Грачани и Никиштане, не се загрозени од пожарот, иако кај населението постои одредена загриженост. Очекувам до доцна вечерва овој пожар да биде ставен под делумна контрола“, изјави Ангелов.

Покрај двата авиони на ДЗС, во гаснењето се вклучени и еден армиски и еден полициски хеликоптер.

Во текот на вчерашниот ден биле регистрирани најмалку 31 пожар на отворено, а екипите морале итно да интервенираат на планината Китка, во Студеничани и во Зелениково.

Нов оган гори и кај селото Копаница под планината Жеден, каде што пожарникарите со денови се обидуваат да ги совладаат пламените. Ангелов предупреди дека овие пожари ги распрснуваат ресурсите токму кога се најпотребни на критичните точки, а втор голем пожар во моментов е активен на тешко пристапен терен меѓу Струга и Дебар.

Share on Facebook

Tweet

Follow us

Save