(Видео) Анталија е во пламен — почина доброволен пожарникар, евакуирани се стотици жители

Доброволен пожарникар утрово почина во Турција откако им помагал на локалните служби во гаснењето на огнената стихија што ја зафати провинцијата Анталија, на медитеранскиот брег на земјата, пренесува „Асошијатед прес“.

Пожарот избувнал во понеделникот во областа Аксу, а поради силните ветрови брзо се проширил кон соседната област Кепез и принуди стотици жители на евакуација. Причината за пожарот засега не е позната.

Хасан Кахја, жител на Аксу кој им помагал на пожарникарите во гаснењето на пожарот, доживеал срцев удар откако вдишал чад и подоцна починал во болница, соопшти градоначалникот на областа, Иса Јилдирим.

Двајца луѓе вчера биле хоспитализирани со изгореници на нозете, а уште шестмина биле згрижени поради вдишување чад. Од прифатилиште за животни во Аксу биле евакуирани повеќе од 100 кучиња.

Турската управа за шумарство соопшти дека денес продолжиле напорите за ставање на пожарот под контрола, додавајќи дека неговиот интензитет е „намален“. Во гаснењето биле ангажирани најмалку три противпожарни авиони, девет хеликоптери, 169 противпожарни возила и повеќе од 1.000 пожарникари.

Во меѓувреме, пожарникарите гаснеле и шумски пожар во областа Козан, во јужната провинција Адана, каде што стотици жители биле евакуирани, соопшти Управата за шумарство.

Share on Facebook

Tweet

Follow us

Save