INFOMAX.MK

Во време кога војната со Иран почнува да се претвора во сериозен политички и економски проблем за Белата куќа, Доналд Трамп очекува конфликтот да не заврши пред клучните избори за Конгресот во ноември, а повторно ја актуелизира и заканата од нов американски напад врз ирански нуклеарен објект.

Зборувајќи во средата (9 септември) на републиканскиот конгрес во пресрет на изборите за Конгресот во Тексас, американскиот претседател го предупреди Техеран во врска со Маунт Пикекс – утврден објект со два длабоки подземни тунелски комплекси, во близина на иранскиот нуклеарен комплекс кај Натанц, каде што се врши збогатување ураниум.

„Гледаме дека има одредени активности во Пикекс. Би го советувал Иран да не прави глупости, затоа што ќе мораме да го погодиме многу силно“, изјави Трамп.

Заканите доаѓаат во исто време кога американскиот претседател вели дека верува оти војната ќе заврши дури по изборите на 3 ноември, кои ќе покажат дали републиканците ќе ја задржат контролата врз Конгресот.

„Војната ќе заврши веднаш по изборите“

„Мислам дека војната ќе заврши веднаш по изборите, затоа што тие повеќе не можат да издржат“, рече Трамп, мислејќи на Техеран.

Во исто време, тој го поврза движењето на цените на нафтата со изборниот календар.

„Веднаш по изборите, цените на нафтата ќе почнат да паѓаат“, им изјави тој на новинарите, додавајќи дека смета оти војната ќе трае „малку подолго од изборите за Конгресот“. На републиканскиот конгрес повтори дека цената на нафтата ќе се намали „откако ќе ја добиеме војната“ со Иран.

Трамп исто така го обвини Техеран дека се обидува да влијае врз изборите. Како што рече, Иран е „очаен“ и се обидува да влијае врз изборите за да дојде на власт „една убава, слаба група луѓе“ која ќе „го остави на мира“ и ќе му дозволи да се здобие со нуклеарно оружје.

Техеран постојано тврди дека нема намера да произведе нуклеарно оружје и дека неговата програма за збогатување ураниум има мирољубива цел.

Зошто Маунт Пикекс повторно е во центарот на вниманието

Маунт Пикекс се наоѓа на околу 220 километри јужно од Техеран и само два километри од комплексот Натанц, еден од најважните ирански нуклеарни објекти.

Во областа е изграден подземен објект со два длабоко закопани тунелски комплекси. Натанц, каде што се наоѓаат две постројки за збогатување ураниум, беше погоден во март во рамките на американско-израелските воени операции против Иран. Објектот беше нападнат и од Израел за време на 12-дневната војна меѓу Израел и Иран минатата година.

Трамп се заканува со напад врз објектот најмалку од средината на јули.

Нафтата на 100 долари и политичкиот притисок врз Трамп

Конфликтот, кој сега е во седмиот месец, се претвора и во критично политичко прашање за Трамп и републиканците.

Американскиот претседател првично предвидуваше дека војната ќе трае само неколку недели. Сепак, економските последици, од цените на горивото до храната, придонесоа за пад на неговиот рејтинг, додека расте притисокот дури и во неговата партија конфликтот што побрзо да заврши.

Цената на нафтата во средата достигна 100 долари за барел, за првпат од јули, откако нападите врз енергетските објекти и танкерите се засилија низ Блискиот Исток.

Претходно во текот на неделата, цената на дизелот во САД достигна историски највисоко ниво, што ги засили стравувањата од нов бран поскапувања во американската економија.

И самиот Трамп призна дека растот на цените на горивото предизвикува негативна реакција кај американските гласачи.

„Луѓето доаѓаат и ми велат: ‘Посакувам да не ја започнавте војната во Иран. Бензинот е поскап’“, рече тој на конференцијата.

Нова ескалација во Ормускиот теснец и Саудиска Арабија

Новото заострување доаѓа по истекот на 60-дневниот прекин на огнот меѓу САД и Иран минатиот месец.

САД и Израел го нападнаа Иран на 28 февруари, по што Техеран возврати со напади врз Израел и земјите од Заливот во кои се распоредени американски бази.

Во средата (9 септември), американската војска соопшти дека нападнала пет танкери со нафта поврзани со Иран.

Техеран возврати со напади врз два американски разурнувачи и осум нафтени танкери во Ормускиот теснец, при што бродовите претрпеле „сериозна штета“, објавија иранските државни медиуми.

Еден ден претходно, јеменските Хути, кои се поврзани со Иран, извршиле бран напади врз Саудиска Арабија, предизвикувајќи големи пожари во нафтени објекти.