„Волстрит џурнал“: Орбан е кандидат за генерален секретар на ОН со поддршка од САД, Русија и Кина

Соединетите Американски Држави го поттикнале поранешниот унгарски премиер Виктор Орбан да се кандидира за функцијата генерален секретар на Обединетите нации, објави „Волстрит џурнал“, повикувајќи се на неименувани извори.

Според весникот, администрацијата на американскиот претседател Доналд Трамп му предложила на Орбан да влезе во трката за една од најважните меѓународни функции. Сепак, планот сè уште ја чека конечната одлука. Како што се наведува, Русија и Кина се подготвени да ја поддржат оваа идеја.

„Кога САД, Русија и Кина сакаат исто нешто во Советот за безбедност на ОН, обично и го остваруваат“, наведува весникот.

Извори од американскиот Стејт департмент проценуваат дека Орбан би можел да ја добие поддршката од 10 од вкупно 15 членки на Советот за безбедност на ОН. Велика Британија и Франција, според „Волстрит џурнал“, главно се претпазливи кога станува збор за употребата на правото на вето.

По шестиот прелиминарен круг на гласање за избор на генерален секретар на ОН, ниту еден кандидат не успеал да ја отстрани можноста за вето од некоја од петте постојани членки на Советот за безбедност: Русија, САД, Велика Британија, Франција и Кина.

Меѓу кандидатите кои се споменуваат како фаворити е и Ребека Гринспан, поранешна потпретседателка на Костарика и раководителка на Конференцијата на ОН за трговија и развој (УНКТАД).

Сепак, нејзината кандидатура не ја поддржуваат две постојани членки на Советот за безбедност кои имаат право на вето, што дополнително го отежнува постигнувањето согласност за изборот на нов генерален секретар на Обединетите нации.

Share on Facebook

Tweet

Follow us

Save