САД бараат од балтичките сојузници да не ја провоцираат Русија

Официјални лица од Пентагон во последните недели бараат од неколку членки на НАТО, меѓу кои се Литванија, Латвија и Естонија, да ги ублажат јавните изјави за заканата што ја претставува Русија, јавува Reuters повикувајќи се на четири упатени извори.

Според наводите на изворите, американската страна смета дека одредени изјави на европските лидери и официјални лица ја нарушиле безбедноста на континентот. Пораките биле пренесени на билатерални средби, а не е јасно дали им биле упатени и на други европски влади.

Запрашан за коментар, претставник на Пентагон изјави дека „приватните разговори меѓу сојузниците се токму тоа“ и дека нема да ги коментира овие наводи.

Барањата пристигнуваат во време кога администрацијата на Доналд Трамп повторно се обидува да издејствува преговарачки крај на војната во Украина, која трае веќе петта година. Најновиот обид комбинира отстапки за Русија, вклучувајќи ублажување на санкциите, со притисок врз Украина да престане да ја напаѓа руската енергетска инфраструктура.

Еден од официјалните претставници кои ја пренесувале пораката е, според изворите, Елбриџ Колби, подсекретар за политика во Министерството за одбрана на САД и една од клучните личности во ревизијата на бројот на американски војници во Европа. Reuters не можеше да утврди кои други официјални лица биле вклучени. Ниту еден од изворите, меѓу кои се тројца европски и еден американски претставник, не изјави дека советот бил пренесен на конфронтирачки начин.

Еден извор наведе дека Колби неодамна му рекол на балтички претставник дека не би требало да има „боцкање“ насочено кон Русите. Како пример за некорисна реторика ги навел јавните тврдења на Европејците дека „Русија е пикната во ќош како стаорец“.

Не е јасно на чија изјава мислел Колби, но естонскиот премиер Кристен Михал кон крајот на септември го нарече Путин „стаорец во ќош“, тврдејќи дека рускиот претседател прибегнува кон саботажи во Европа бидејќи Русија е сè повеќе заглавена во Украина.

„Ви помагаме. Американците се тука. Само не бидете гласни. Не правете бучава“, рече друг европски претставник, опишувајќи ги пораките од Пентагон.

На одделна средба, Пентагон ѝ порачал на естонската делегација да биде „одмерена“ во комуникацијата, иако, според изворот, немало забелешка за некоја конкретна изјава. Министерствата за одбрана на Литванија, Латвија и Естонија не одговорија на прашањето на Reuters, а НАТО одби коментар.

Еден од европските претставници изјави дека советот од Пентагон, иако срдечен, е збунувачки, бидејќи балтичките разузнавачки служби во последните месеци доследно ја намалуваат веројатноста Русија да ги тестира одредбите на НАТО за заедничка одбрана. Други разузнавачки служби на НАТО, од друга страна, јавно предупредуваат дека Русија наскоро би можела значително да ја засили кампањата на саботажи.

Западните разузнавачки претставници тврдат дека Москва неодамна ги засилила тајните напади врз членките на НАТО, што Русија го негира. Германското обвинителство во средата соопшти дека се уапсени двајца Белоруси осомничени дека планирале да подметнат пожар во зграда или објект од критична инфраструктура во областа на Нирнберг. Во септември германската влада ја обвини Русија за обид за напад со дрон врз аеродромот Лајпциг/Хале.

Истовремено, американските претставници разговараат за можни деловни аранжмани со Русија во рамките на мировните напори, додека Пентагон го ревидира присуството на американската војска во Европа, што би можело да доведе до значително намалување на бројот на војници на континентот. Вашингтон порачува дека европските членки на НАТО мора да преземат поголема одговорност за сопствената одбрана, бидејќи САД се фокусираат на заканите на Блискиот Исток, во Латинска Америка и во Источна Азија.

Share on Facebook

Tweet

Follow us

Save