Песков се согласува со Трамп: Украина веќе е поинаква земја од географска гледна точка

Портпаролот на Кремљ, Дмитриј Песков, ја коментираше изјавата на американскиот претседател Доналд Трамп дека по завршувањето на војната Украина ќе има „малку поинаква форма“.

Според Москва, земјата веќе е променета од географска гледна точка – очигледна алузија на териториите што ги зазедоа руските сили, забележува „Украинска правда“.

Ставот на руската страна следува по интервјуто на Трамп за емисијата „60 минути“ на телевизијата Си-Би-Ес. Американскиот претседател изрази уверување дека Украина ќе остане слободна и независна држава, но дека нејзините граници веројатно ќе бидат променети како дел од евентуален мировен договор.

„Што се однесува до територијата на Украина, од географска гледна точка таа веќе е друга земја. Реалностите на терен се очигледни и тешко дека некој може да ги негира“, изјави Песков за агенцијата ТАСС.

Според податоците што украинскиот претседател Володимир Зеленски ги презентираше во септември, од почетокот на 2026 година Русија окупирала 890 квадратни километри украинска територија, додека украинските вооружени сили успеале да вратат контрола врз 800 квадратни километри. Зеленски тогаш изнесе и податоци за 270.000 руски загинати и ранети.

Во меѓувреме, се интензивираат дипломатските напори за прекин на огнот. Специјалниот пратеник на САД, Стив Виткоф, соопшти дека за 10 и 11 ноември се закажани трилатерални преговори меѓу претставници на Вашингтон, Киев и Москва во Абу Даби.

Песков го потврди учеството на Русија и посочи дека руската делегација повторно ќе ја предводи претседателскиот советник Владимир Медински.

Зеленски изјави дека по серијата разговори меѓу европските лидери и Кремљ се чувствува реална подготвеност на Москва за сериозен дијалог во Обединетите Арапски Емирати. Сепак, за време на Конференцијата за безбедност во Берлин, тој потсети дека, според него, од стратешка гледна точка, за Русија „мирна и обединета Европа и натаму е непријател“.

Паралелно со тоа, Трамп во интервју за „Фајненшл тајмс“ изјави дека смета оти двете страни во конфликтот се подготвени за компромис и за седнување на преговарачка маса со цел постигнување конечен договор.

Share on Facebook

Tweet

Follow us

Save