Нападнат клучниот саудиски нафтовод „Исток–Запад“: Избувнал пожар, транспортот на нафта продолжува

Саудиска Арабија соопшти дека нејзиниот стратешки нафтовод „Исток–Запад“ денеска бил цел на напад во регионот Медина, при што избувнал ограничен пожар. Според Министерството за енергетика, огнот е изгаснат, нема загинати или повредени, а работата на нафтоводот не е нарушена.

Итните служби и специјализирани технички екипи веднаш биле испратени на местото и презеле мерки за обезбедување на објектот и проверка на неговата безбедност. Саудиските власти во соопштението не наведуваат кој го извршил нападот, па одговорноста на Хутите за денешниот инцидент засега не е официјално потврдена.

Нафтоводот има исклучително значење за саудискиот извоз бидејќи ги поврзува нафтените области на истокот на земјата со пристаништето Јанбу на Црвеното Море. На тој начин овозможува транспорт на сурова нафта со заобиколување на Ормускиот Теснец.

Според „Ројтерс“, Саудиска Арабија преку оваа рута пренасочила околу четири милиони барели сурова нафта дневно поради нарушувањата на поморскиот транспорт низ Ормус. Тоа количество претставува приближно четири проценти од светската понуда, што ја покажува важноста на нафтоводот за меѓународното снабдување.

Денешниот напад следува по вчерашниот инцидент во Ријад, каде што беше оштетена деловна зграда на нафтениот гигант „Арамко“. За тој напад одговорност презедоа јеменските Хути. Саудиското Министерство за енергетика соопшти дека оштетувањата биле предизвикани од остатоци при обидот за напад врз зградата.

Share on Facebook

Tweet

Follow us

Save