Mитрески во Собрание пресметуваше дека со минималната плата може да се јаде само ѓеврек и јогурт, Ристески-Пеката му дофрли: „а бурек и маслинки?”

За Предлогот за измена на Законот за минимална плата, поднесен од пратениците на Социјалдемократски сојуз на Македонија и Левица, со кој се предлага минималната месечна плата да изнесува најмалку 600 евра, денеска се расправаше во Комисијата за економски прашања.

Во текот на расправата, пратениците од ВМРО-ДПМНЕ не се јавија за збор. Додека траеше дискусијата, од нивните редови имаше дофрлувања.

Пратеникот на СДСМ, Јован Митрески, преку конкретен пример ја илустрираше состојбата со трошоците за живот.

„Едно четиричлено семејство секој ден да јаде три оброка само ѓеврек и јогурт, со оваа минимална плата на крајот на месецот ќе му фалат 400 денари“, посочи Митрески.

Додека тој ги образложуваше пресметките, од место реагираше пратеникот на ВМРО-ДПМНЕ, Петар Ристески.

„И бурек спомни, не само ѓеврек. А маслинки?“, дофрли Ристески со смеа од место, по што ја напушти салата.

Share on Facebook

Tweet

Follow us

Save