Вучиќ помилувал пет лица во Србија: Меѓу нив и поранешната висока функционерка на МВР, Дијана Хркаловиќ

Вишиот суд во Белград потврди дека ги примил одлуките на српскиот претседател Александар Вучиќ за помилување на пет лица против кои се водела или сè уште се води кривична постапка пред овој суд. Меѓу помилуваните е и Дијана Хркаловиќ, поранешна државна секретарка во Министерството за внатрешни работи на Србија, објави „Нова.рс“.

Помилување за Дијана Хркаловиќ
Според соопштението на судот, со одлука донесена на 27 септември 2026 година, Хркаловиќ е ослободена од кривично гонење за делото трговија со влијание. Постапката против неа се водеше пред Посебното одделение за организиран криминал при Вишиот суд во Белград.

Хркаловиќ важеше за една од највлијателните личности во српската полиција и беше блиска соработничка на поранешниот министер за внатрешни работи Небојша Стефановиќ. Во МВР работеше од 2014 до 2019 година, а нејзиното име со години се поврзуваше со сомнежи за врски меѓу полицискиот врв и организираниот криминал.

Таа беше обвинета за злоупотреба на службената положба со цел попречување полициски истраги и заштита на одредени лица од криминалното подземје. Меѓу обвиненијата беа и попречување на постапката против Вељко Беливук, водач на криминална група обвинета за низа брутални убиства, како и прикривање дел од прислушуваниот разговор на убиениот адвокат Драгослав Огњановиќ.

Во јануари 2025 година, Хркаловиќ во првостепена постапка беше осудена на една година и четири месеци затвор. Сепак, пресудата подоцна беше укината, а судот нареди повторно судење.

Кои се другите помилувани?
Со истата одлука, Небојша Ѓокиќ е ослободен од кривично гонење за перење пари, додека Марко Павловиќ доби помилување за обид за тешко убиство.

Помилувана е и Драгана Живанадиновиќ, против која се водела постапка за злоупотреба на службената положба и фалсификување службена исправа.

Петтото помилување се однесува на Милош Дугалиќ, кој веќе имал правосилна затворска пресуда. Вучиќ го ослободил од понатамошно издржување на казната изречена со пресуда на Апелациониот суд во Белград од 20 март 2025 година.

Од судот не соопштија дополнителни детали за останатите помилувани лица, ниту ги образложија причините поради кои претседателот одлучил да ги донесе овие одлуки.

Одлуките пристигнале во судот
Одлуките за помилување се донесени на 27 септември 2026 година, а Министерството за правда ги доставило до Вишиот суд во Белград по електронска пошта на 2 ноември.

За Хркаловиќ и уште три лица, помилувањето значи запирање на кривичното гонење за наведените дела. Дугалиќ, пак, е ослободен од понатамошно издржување на веќе изречената затворска казна.

Share on Facebook

Tweet

Follow us

Save