Затворски казни за навивачи на Хајдук поради величење на Хитлер во Сплит

Првата судска пресуда поради скандалозните нацистички извици пред и за време на натпреварот меѓу Хајдук и Ајакс во Конференциската лига е изречена во Сплит. Еден од навивачите е казнет со 10 дена затвор поради навреди на верска и национална основа и прекршување на прописите за однесување на спортски настани.

Случајот се однесува на инцидент што предизвика остри реакции поради антисемитските пораки и величењето на нацистичката идеологија. Според хрватските медиуми, 24-годишен навивач, идентификуван како Јуре Д., е прогласен за виновен за два прекршоци.

Полицијата го обвинила дека бил под дејство на алкохол за време на спортскиот настан, како и дека упатувал навреди кон играчите и членовите на стручниот штаб на Ајакс врз основа на нивната верска и национална припадност.

Инцидентот предизвика бурни реакции во Хрватска, а надлежните служби покренаа постапки за идентификување на лицата што учествувале во спорните настани. Пораките што се слушале пред натпреварот беа осудени поради ширење омраза и величење тоталитарни идеологии.

Сплитската полиција продолжува да прегледува стотици снимки со цел да ги идентификува сите учесници во поворката за време на која се скандирало името на нацистичкиот водач Адолф Хитлер и се навредувале Евреите.

Со изрекувањето на првата казна, правосудните органи испратија порака дека ваквите испади на спортските настани може да бидат санкционирани. Сепак, останува да се види дали ќе следуваат и други пресуди против лицата што учествувале во инцидентите.

Настаните во Сплит повторно го отворија прашањето за одговорноста на навивачите и сузбивањето на говорот на омраза на спортските настани, каде што во преден план треба да бидат спортот и поддршката за клубовите, а не националната и верската нетрпеливост.

Share on Facebook

Tweet

Follow us

Save