Истрага на Ковеши во Германија стигна и до Бугарија

По барање на Европското јавно обвинителство во Минхен, Германија, во Чешка се уапсени пет лица осомничени дека се организатори на криминална шема за измама со ДДВ, поврзана со продажба на безжични слушалки. Во рамките на истрагата со кодно име „Echo“ биле запленети и имот и други средства во Чешка, Германија и Литванија. Истрагата на Европското јавно обвинителство стигнала и до Бугарија, каде што биле регистрирани компании кои учествувале во шемата.

Се смета дека осомничените се раководители на организирана криминална група која најмалку од 2019 година применувала шема за измама со ДДВ при трговија со „AirPods“, со што во периодот од 2019 до 2023 година била предизвикана штета од приближно 20 милиони евра.

Шемата била осмислена со цел да ги искористи правилата на Европската Унија за прекугранични трансакции меѓу земјите членки, кои се ослободени од данокот на додадена вредност (ДДВ), преку основање фиктивни компании со кои биле симулирани прекугранични синџири на снабдување.

На тој начин сторителите можеле да бараат поврат на ДДВ, иако соодветниот данок не бил пријавен или платен во Германија.

Според собраните докази, осомничените биле управители или фактички раководители на компании вклучени во фиктивните синџири на снабдување, регистрирани во Бугарија, Чешка, Германија, Унгарија, Литванија и Словачка.

Покрај апсењата, во Чешка биле запленети и недвижности. Замрзнати биле и банкарски сметки во Чешка, Германија и Литванија.

Share on Facebook

Tweet

Follow us

Save