Кумановец урнал куќа која била заштитено културно наследство, па изградил објект на државно земјиште

Педесет и двегодишник од Куманово ќе се гони кривично под сомнение дека урнал куќа која била дел од заштитено културно наследство и на државно земјиште изградил нов објект.

Кривична е поднесена и против градежна инспекторка која донела решение врз неточно утврдена фактичка состојба.

– СВР Куманово поднесе кривична пријава против Ф.Ф.(52) и Л.Т.(52), двајцата од Куманово, поради постоење основи на сомнение за сторени кривични дела „оштетување или уништување на добра под привремена заштита или културно наследство и природни реткости“, „бесправно градење“, „узурпација на недвижности“ и „несовесно работење во службата“, информираат од Министерството за внатрешни работи.

Како што појаснуваат од МВР, првопријавениот, во 2023 година, срушил и уништил куќа- заштитен објект на културно наследство, на кој била поставена спомен плоча на народниот херој Киро Нацев Фетак, кој објект, согласно член 20 од Законот за меморијални споменици и спомен обележја е заведен во регистер на спомен обележја како заштитен објект на културно наследство и е заведен во програма за одбележување на значајни настани и личности  со спомен обележја во општина Куманово.

– На таа локација, првопријавениот, во својство на инвеститор на градба извршил градежни работи и изградил градба од втора категорија, без претходно одобрение за градење издадено од Сектор за урбанизам при општина Куманово, со што постапил спротивно на член 59 од Закон за градење, а објектот го изградил на земјиште сопственост на државата, појаснуваат од полицијата.

Според МВР, второпријавената како овластен градежен инспектор несовесно постапила во вршењето на своите должности и овластувања на начин што донела решение врз основа на нецелосна и неточно утврдена фактичка состојба, а која била должна да ја утврди согласно член 9 од Закон за инспекциски надзор во врска со член 2 а од Закон за градење.

Share on Facebook

Tweet

Follow us

Save